–ઇમર્જન્સી એક્સટિંગ્વિશર નીકળ્યા શોભાના ગાંઠીયા સમાન
-નજીકના બંગલો અને કોમ્પ્લેક્ષના રહેવાસીઓમાં દહેશતનો માહોલ
વાપી કોપરલી ચાર રસ્તા ગાંધી સર્કલ નજીક આવેલ સોનોરસ બિલ્ડિંગમાં પાવર સપ્લાય માટે લગાવેલ DG સેટના કેબલમાં આગ લાગતા અફરાતફરીનો માહોલ ઉભો થયો હતો. આગના ધુમાડાથી સોનોરસ બિલ્ડીંગ નજીક આવેલ બંગલામાં અને હવાભાઈ એપાર્ટમેન્ટમાં લોકોએ ગૂંગણામણ અનુભવવાનો વારો આવ્યો હતો.બિલ્ડિંગમાં જ ફાયર સેફટીને પ્રાધાન્ય આપી લગાવેલ તમામ એક્સટિંગ્વિશર એક્સપાયરી ડેટના નીકળ્યા હતાં.આગની ઘટના દરમ્યાન ફાયરટીમને બોલાવતા આગને કાબુમાં લીધી હતી
વાપીમાં ગાંધી સર્કલ નજીક આવેલ સોનોરસ બિલ્ડિંગમાં સોમવારે આગની ઘટના બની હતી.જેમાં બિલ્ડીંગના સંચાલકોની લાલીયાવાડી સામે આવી હતી આ બિલ્ડિંગમાં બેન્ક, હોસ્પિટલ, સહિત અનેક જાણીતી બ્રાન્ડની ઓફિસો, દુકાનો આવેલી છે. જેમાં વીજ પુરવઠો ખોરવાય તો તાત્કાલિક DG સેટથી વીજળી પુરી પાડવા 11 જેટલા DG સેટ લગાવવામાં આવ્યા છે. જેમાંના એક DG સેટમાં અચાનક આગ લાગતા આસપાસના વિસ્તારમાં રહેતા લોકોમાં અને બિલ્ડીંગના લોકોમાં અફરાતફરી નો માહોલ ઉભો થયો હતો.આગની ઘટના બનતા તાત્કાલિક આગને બુઝાવવા બિલ્ડિંગમાં ફાયર સેફટી માટે લગાવેલ એક્સટિંગ્વિશરની મદદથી બિલ્ડીંગના ગાર્ડ અને અન્ય લોકોએ આગ બુઝાવવાની કોશિશ કરી હતી.પરંતુ તમામ એક્સટિંગ્વિશર 2022ના હોવાથી તેની એક્સપાયરી ડેટ પુરી થઇ જતાં એકપણ એક્સટિંગ્વિશર કામ લાગ્યું નહોતું.પરંતું આગને વધુ પ્રસરતાં જોઇ આખરે વાપી નગરપાલિકા અને વાપી નોટિફાઇડ ફાયરને જાણ કરતા બંને વિભાગના ફાયરે આવી આગ પર કાબુ મેળવ્યો હતો.
આગની ઘટના અંગે પ્રાથમિક મળતી વિગતો DG સેટના કેબલમાં શોર્ટ સર્કિટ થવાથી આગ લાગી હતી.અહીં સોનોરસ બિલ્ડીંગના DG સેટ નજીક જ બંગલો અને એપાર્ટમેન્ટ આવેલા છે.જેમાં રહેતા પરિવારોને આગના ધુમાડાથી ગભરામણનો સામનો કરવો પડ્યો હતો.તેમજ ધુમાડાને કારણે ઇમારતમાં કલર સહિત અન્ય નુકસાન થયું હતું.જે અંગે સ્થાનિક રહેવાસીઓ બિલ્ડીંગના સંચાલકો સમક્ષ રજુઆત કરવા આવ્યા હતાં.પરંતુ સંચાલકો આગ જેવી ગંભીર ઘટના બાદ પણ સ્થળ પર ફરકયા નહોતા.વધુ મળતી માહિતી મુજબ આ આગની ઘટના બીજીવાર બની છે. એ ઉપરાંત અહીં અવારનવાર GEBના ટ્રાન્સફોર્મરમાં અને વીજ કેબલમાં ધડાકા થતા આવ્યા છે.આવી વારંવાર ઘટનાઓ બાદ પણ ફાયર સેફટી મામલે સંચાલકોની બેફીકરાઈ પર આસપાસના લોકોએ પોતાનો આક્રોશ ઠાલવ્યો હતો.
વાપીથી આલમ શેખનો રીપોર્ટ
