પંચમહાલ જીલ્લા કાલોલ નગરમાં સતત બે કલાક સુધી પડેલા ભારે વરસાદને કારણે જનજીવન પ્રભાવિત થયુ હતુ. નગરના નીચાણ વાળા વિસ્તારોમા તો પાણી ભરાઈ ગયા, અને નગરપાલિકામા પણ પાણી ભરાઈ જતા સ્થિતી કફોડી બની હતી. જોકે આ વિસ્તારોમાં આવેલી દુકાનો અને મકાનોમા પણ પાણી ઘુસી જતાં વેપારીઓને આર્થિક નુકશાન વેઠવાનો વારો આવ્યો હતો.
પંચમહાલ જીલ્લામા મેઘરાજાએ ફરી ધમાકેદાર રી એન્ટ્રી કરી છે. પંચમહાલ જીલ્લાના તમામ તાલુકાઓમા સારો એવો વરસાદ નોધાયો છે. જેમા શહેર, ગોધરા, હાલોલ, કાલોલ, જાંબુઘોડા, તેમજ ઘોંઘબા અને મોરવા હડફ તાલુકામા પણ વરસાદ નોધાયો છે.જીલ્લાના કાલોલ નગરમા મેઘરાજા મન મુકીને વરસ્યા હતા. વરસાદને કારણે નગરના નીચાણવાળા વિસ્તારોમા પાણી પાણી થઈ ગયુ હતુ.કાલોલ શહેરમા પ્રતિવર્ષ ચોમાસામા નીચાણ વાળા રહેણાક વિસ્તારોમા પાણી ભરાવાની સમસ્યા બને છે. તેમ આ વરસાદને કારણે પણ નીચાણવાળા વિસ્તારોમા પાણી ભરાયા હતા.કાલોલ નગર પાલિકાની ઈમારત પણ આ વરસાદી પાણીથી બાકાત રહી ન હતી અંદાજીત એક ફુટ જેટલા પાણી ભરાયેલા જોવા મળ્યા હતા.
કાલોલની શાકમાર્કેટ અને આસપાસની દુકાનોમા પણ પાણી ઘુસી જતા વેપારીઓને માથે હાથ મૂકી નુકશાની વેઠવાનો વારો આવ્યો હતો. જેના પગલે તંત્રએ પોતાની કામગીરી શરુ કરી દેતાં પાણીનો નિકાલ કરવાની કામગીરી હાથ ધરી હતી. ત્યારે તંત્ર દ્વારા પ્રિમોન્સુન કામગીરી યોગ્ય રીતે અને યોગ્ય સમયે કરવામા આવે તો આ સમસ્યા વેઠવાનો વારો નહી આવે તેવી લોકચર્ચાઓ નગરમા થતી જોવા મળી હતી.જીલ્લા કન્ટ્રોલ રુમ તરફથી મળેલા વરસાદી આંકડા મુજબ શહેરામા 30મીમી, મોરવા હડફમા 41મીમી, ગોધરામા 83મીમી,કાલોલમાં 67મીમી,ઘોઘંબામા 24મીમી,હાલોલમા 41મીમી,જાંબુઘોડામા 12મીમી વરસાદ નોધાયો હતો.
પંચમહાલથી વિજયસિંહ સોલંકીનો રીપોર્ટ
